Friday, 15 May 2020

Kerenja vy ew marthys teg - Michelle James SWF L Trad.

An cân ma a vedha kenys gen Michelle James dhort Trurû dhe'n ayr "Black is the colour of my true love's hair" saw nag ew treylyans, tabm veth.

Glas an mor.
Kerenja vy ew marthys teg.
Pa gan, pa gows hy lev ew wheg.
Lagajow bewek, glas a’n mor
Tewl hy blew, liw a’n dor.

Me 'venja bos lebma hei 'mos,
An termyn-na, mar medn dos,
Ha kerdhes dorn ha dorn genjy,
Ha cowsel pelha whath dhedhy.

Res ew dhebm mos a’n telher-ma,
Pell dhort an pow ha'n venyn-na.
Ow holan vy ew ogas trogh, hy abm medhel war ow bogh.

Notednow: venja = vynsa, vynja.

Rag clowes an ayr kenys gen Christy Moore: https://www.youtube.com/watch?v=W5fBppsntAE

Monday, 11 May 2020

An den war an cay - gen Neil Kennedy SWF L Trad.

Pa thera vy trigys en Devryon (Devron) tho da genam kerdhes dhe delher henwys Bal, nag o pell a'n chei. Ma Bal war splatt dor isel üjy ' ystyn nebes e'n dowr còsel an Heyl. Ena, ema scathow dhe weles, scathow revya ha scathow ester, ha terweythow cok pò dew anodhans pa vo othom dhe'n bòscadoryon aga fayntya pò mendya neptra. Tremenys ewa lebmyn, bès e'n dedhyow-na, thera Ralph Bird trigys ena, ev neb a vyldyas lies a'n gigys (gigs) nowydh fin a eron ow qwelys a-dro dhe'n als, en pub porth a'n pow ogastei. An peth a vedh merkyes gen an òmweloryon en kensa oll ena ew vos ûhel an jynnjy coth, sqwachys ha codhys lebmyn, rag obma thera Bal Carnon e'n nawnjegves cansbledhen. Thera an whel hedhes en dadn an dowr dhe gawas sten ha cober. Ma clowys genam fatel era dowr ow codha war an düs era ow conis ena. Nag eus tros veth she vos clowys ena e'n jedh hedhyw – tra veth bes cân an edhyn, gelvinogas (curlews), piboryon (sandpipers) lagyoryon (waders) a bub ehen a ginda, ha terweythyow, son tractor a'n parkow pell. Da o genama mos dhe'n telher-na, rag o plesour puppres, gen costrel a goffy ha tabm dhe dhebry. Thera scavel ena, nag o moy avel styllen garow settys war dew ven. My a sedha warnodhy rag mires ort an peth era a-dro dhebm ha puppres eth o deffrans, warlergh ûhelder an mor ha'n gewer ha'n mis. Thera vy ow sedha endelha, üdn termyn, pa wrüg den coth dos war o fydn, gwydn y vlew ha nebes hir. Thera bar (pò barv) dhodho, onan gwels, ha dilhas powes. My a'n kemeras rag lymner (painter) pò carer edhyn dhort Pow an Sowson ha nei a gowsas warbarth, termyn hir, dro dhe'n telher ha'n scathow ha'n mor. Der y vaner dhe clappya – Sowsnek an BBC en termyn eus passyes – tho spladn nag o den dhort Besow (Bissoe) pò Peran, bes thera neppeth et y condük pò y omdhegyans a'm gorrys dhe bedery (bredery) dr'o Kernow a veu Sowsnekhes – dre reson a spendya radn y floholeth en mes a'n pow, rag sompel, pò dre reson bos devanys a les dhe scol. Ev a oya dhe leverel henwyn Kernôwek avela nei ha pa wrüga vy compla a'n tavas-ma, ev a oya dro dhe'n Ordinalia ha 1549 ha whath moy. An nessa termyn, pa wressen cows pelha a'n pow, e lavaras fatel o Sows y sira ha Kernowes y dhama. Y hanow ev o William ha thera trigys en ogas. My a glowas e veu genys e'n strêt henwys Mount Wise en Towyn Blistra, pecar'a'n sira vy. Nei a spendyas termyn hir ow clappya dro dhe hedna ha fatel wrüg y bobel mos dhe vewa en Wiltshire òja ev dhe vos genys. Termyn òja termyn, nei a vetya endelha e'n dre pò war an cay en Devryon – bès beska na wrüg compla y second hanow dhe vos Golding. Dar, tho an scrifer a bris William Golding a scrifas Lord of the Flies ha Rites of Passage ha whath. Neil

Tuesday, 5 May 2020

Troyl - a day out - gen Richat Gendall

This text from p. 28 of Tavaz a Ragadazow by Richard Gendall (2000) has been put into the SWF L Trad., the spelling now used by Cussül an Tavas Kernôwek.

An seson ew an kidnyadh. Üdn jorna, pa wrüga vy divüna e'n mettin, an howl wrüg spladna ha'n edhyn wrüg cana. My a savas emann (yn bann) mes an gwily ha mos en dor dhe'n gegin. My a fyttyas te, ha nena degy bolla emann dhe'n chombour. My a shakyas ow wreg a hy scoodh.

"Gwras devüna, melder !," medham, "Dedh teg ew."

Nei wrüga kestalkya ha hei 'eva hy the.

"Fatla qwra nei gwil troyl hedhyw ?" medham. "Nei ell dreivya dhe neb telher teg ha drei croust gena nei."

"Baris," medh hei. "My a venja mos dhe Goonvre dhe cüntel eyrin. E veu showr nodhans an vledhen diwettha."

Wòja cawas hânsel, my wrüg lâl, "Elles ta fyttya tabm ha my ow trei mes an car ?"
"En dhiogel !" emedh hei.

My egeras an carjy bès pa venja vy egery an car, ha pa wrüga vy gòrra ow dorn et ow fockat rag senjy an alwedhow, ca ! Na aljama trouvya anjei !

"Na wörama pele ma gerys genam alwedhow an car, colon. Eus gwres genes sight nodhans telher veth ?"

"My a venja ga gweles et an skival eus war an dresser, sos."

"A ! Ottowns genam !"

"The season is autumn. One day, when I woke in the morning, the sun shone and the birds sang. I got up out of bed and went down to the kitchen. I made tea and then carried a cup up to the bedroom..."