Sunday, 26 March 2017

Cabmdhavas gen Nicholas

Artickel en KS.

An Kilgoodh gen cabmdhavas.
Pàn vo an howl ow spladna han glaw ow codha in kettermyn, y fëdh gwelys i’n ebron pleg brâs lieslyw. Hanow Sowsnek an wharvedhyans yw ‘rainbow’ hag yth ywa causys der an golow dhyworth an howl ow mos dre dhagrednow an glaw hag yth yw kenyver badna an glaw kepar ha prysm bian ow stubma an golow dhe wil oll lywyow an spectrùm: rudh, melenrudh, melen, gwer, blou, blou tewl ha glasrudh. Dre rêson bos an pleg formys dre wolow an howl ow mos der an glaw, y fëdh an pleg gwelys pùpprës wàr denewen an ebron adâl an howl. In gwiryoneth an pleg yw kelgh, saw ny welyr mas radn anodho dhyworth an dor. Pàn vo pobel avàn in jyn neyja, y a yll gweles an pleg avell kelgh rônd in dadnans. In Kernowek Coth an ger rag ‘rainbow’ yw camnivet. In Kernowek Cres hedna a via *camneves, ger usy ow styrya tra gabm an nevow. Yth hevel nag o an hanow-na cler lowr dhe Gernowegoryon an Osow Cres hag y a gemeras an secùnd element neves avell form a davas pò devessheep. Ytho in Kernowek Dewedhes ny a gav an lavar coth: Cabmdhavas in mettyn, glaw ’yll bos etten. Etten yw form holergh rag ino ‘in it.’ I’n dedhyow coth, pàn na wodhya an bobel an rêson rag an gabmdhavas, y a gresy warlergh redya whedhel Noy in Beybel, y vos tôkyn dhyworth Duw na wre va budhy an norvÿs nefra arta dre livyow. Yma whedhel Noy hay lester kefys dywweyth in lien agan tavas-ny, in Origo Mùndi hag in Creacyon an Bÿs. I’n secùnd anodhans, warlergh an liv yma Noy owth offra sacryfîs dâ dhe Dhuw. Fest plêsys yw Duw gans hedna hag ev a lever dhe Noy:

Rag hedna sur me a wra benytha wosa hebma,
in ebron y fÿdh gwelys,
an gabmdhavas yn tefry.
Pesqweyth mays gwellowgh why hy
remembra ahanowgh why
me a wra bys venary.
Trest jy dhybmo,
dystrùcsyon vëth an par-na
benytha dre dhowr ny wrav
awos destria an bÿs-ma.

Res yw fatell vedha agan hendasow sewajys yn frâs wosa glaw poos, pàn wrellens gweles an gabmdhavas, rag y o certan na wre Duw nefra dystrôwy aga bÿs arta.


Note: KS does not use the graph iw seen in the SWF. Neil

No comments:

Post a Comment