Sunday, 20 November 2016

Omwel

Egloskerry. Pele ma Peder?
Tremmîs trigys ew Peder en Egloskerry, bes na veu kevys whel dhe wil ganjo whath. Thera kebmys a bobel yonk heb whel ena, ha ev bes onan anodhans.
"Whei alja spenja (spendya) hirneth ' whilas whel, boya," medh y sira. "Cussel dha via dhe whilas telher en Collej Tecknical; gwell ew vel boas nevra war an dôl, ha ort gwil hedna whei wra cawas gwell whel en diwedh*."
"Dr'aljama gwil ena ? Nag o vy vas dhe draveth !"
"Brabm an gath ! Whei or tedna en spladn ! Ha peneyl vedna whei kens, traylya dhe scajan pò desky neppeth vas ?"


War an diwa Peder o convictyes, ha tell gôtha e vednas telher war dheskans Tedna Tecknical. Orlena, üdn jorna e gavas lether ort y greia dhe dhoas dhe omwel en Poll lebma thera an Collej. Ev a gomeras an kytterin en Tregadillet ha doas dhe'n Collej bedn üdnek eur. Thera lies chei ena, ha routh veur a dheskiblon moas ha doas. Na alja va godhvas en vas pana tû dhe draylya. E dheth nes dhe üdn vos (vowes) hir hy blew, ha e wrüg gofen,


"Gafans dhort whei, oro whei lâl dhebm pele ellama trouvya Radn an Artys, mar pleg ?"
"En dhiôgel ! Kewgh en hans compes terebo whei dhe dhoas dhe'n chei ûhel broas-na e'n pelder. Ena traylya tûa dyhow. Whei wra gawas chei an Artys en barh cleth òja cans lath."
"Gra'massy!"
"Nag ew dhe voas accomptys !"
War nebes lavarow, Peder wrüg pur dha, ha telher veu profyes dhodho straft...
"Mar qwressa whei y gemeres emann ken pedn an seythen ha dressa whei gonys da ha hombreva abel," a junyas an deskador.
Ha Peder gara an chei e dheth bedn an vos yonk dhe neb e wrüg bes lebmyn gofen an vorr.
"You !" medh hei. "Pana fara wrüga whei a'n omwel ?"
"Fatel wrügo' godhvas d'rüga vy moas dhe omwel ?"
"Thew scrifys oll dresta whei, sos ! Thera vy ' moas dhe'n canteen... Veddo whei ûsya tabm ?"

[Tednys dhort An Curnoack Hethow gen Richat Gendall ha gorrys e'n FSS D.]
*diwedh (SWF) should be spoken as though spelt deweth.

No comments:

Post a Comment