Friday, 18 September 2015

Daralla Bobby an Bujy gen Clorinda

Bujy glas ew hebma.
Lebma nebes bledhednyow, me wrüg cawas dew vujy ha üdn godhûher an kensa anodhans, leb o creiys Bobby, a wrüg merwel. An nessa mettin, an mab vy, leb ew creiys Adrian, a verkyas pur üskys dr'o Bobby gellys.
"Pele ma Bobby?," medh ev.
"Bobby geth dhe' Nev," me a lavarras dhodho.
Pajar bloodh o mab vy ena; rag hedda na oya ev meur dro dhe hebma.
"P'wrüg gery an daras?" medh ev.
Me a dhallathas laul, der lavarow sempel, pur es ha pur vedel (= v/medhel), dr'üjy keffres pobel ha bestas o moas dhe' Nev pa thens marow. "Nev ew telher pur spladn," medham dhodho. "Bobby vedn neija an dro gen ethyn erel. Pur lôwen vedh, ha frank."
Ev a olas! An termyn a dremenas. Terweythyow o mab vy era cofen dhortam deffrans qwestyons dro dhe' Nev. Eneth ev a gussulyas der gotha dh'y sera trouvya skil (SWF M skeul) rag drei Bobby dhodho dhort an nev awarha. Scon òja hedna, an nessa bujy a verwas ewedh. O mab oya pub tra dro dhe Nev ha nag o va maga trûan vel kens. Gwenton wrüg doas. Nei geth rag'an degolyow en Kembra. Pa thera nei en Kembra, nei geth dhe hujeth lôwarh ledan. Thera an howl spladna en eborn glas. Nag era commol veth awarha. Tho jorna teg, pecar'a paraves. War bub trenewen thera meur a flowrys a lies liw: rüdh, glas, melyn, gwydn, kigliw, rüdhvelyn ha whath moy.
Thera sawarn wheg e'n ayr ha keniver tra o cosel ha teg. Nei gerras dro dhe'n lôwarh ha nena, en cres, nei drouvyas chei edhyn pur vroas. O mab vy a savas ena heb gwaya en miras ort an edhyn a d[h]effrans sorthow era neija etto. Mesk anjei thera lies bujy pecar'a Bobby. Thera va saval ena termyn hir heb laul ger veth. Òja spas ev viras orta vy, lavaral,
"Nev ew hebma, Mabm?"
"N'ora vy," medham. "Na wrüga vy besca gweles Nev."
Medh e, "Thew Nev heb dout, rag thew pur deg, maga spladn vel paraves."

Daralla gwir ew hebma. Clorinda Hollis, genys Vigus, a dhescas Kernôwek en Chei Murdoch en bledhednyow deg ha pajar ügens.  

No comments:

Post a Comment