Wednesday, 12 August 2015

Willie Osborne gen Peter Jenkin

Piw ew hebma, "Willie" Osborne? Ownter dama-wydn vy ew! Pemp ugens ha pemp bloodh (po cans ha pemp) o ev pa wrüga merwel. Thera trigys en Four Lanes ogas dhe Redruth, bes genys veu en 1888 en Trythall ogas dhe (g)Crankan (Car-anken) ha Newmill ogas dhe (b)Pensans.

Da o ganjo miras ort rugby, ha thera obery vel jynnor en Climax a (g)Cambron. Ha y vab ev whath yonk, nans ew cansvledhen, anjei a longya moas warbarh terweythyow en jynn-diwros (gen carr adenewen), bys en Plymouth. 

Teetotaller o va a'y oos ev ewedh. Ma whath en Newmill, vel chei lebmyn, üdn chapel coth, nag o bes chapel Methodyst sempel:
na, chapel Teetotal Wesleyan Methodyst o! Jolif o Willie keffres - ha ev o clappya ha grysla gena nei en Four Lanes, ev a wrüg govyn, "Fatel ell den eus dhodho bes üdn sagh a (g)low, omwitha rag an yeynder dres an gwav oll ?"  - "Mmm, ... na ora vy..." 
"Doan e' war y geyn ev bys en Pensans ha dewheles, pub dedh oll !"

Alebma dhe'm govyn vy. Theron nei o qweles an skeusen ma üjy o tisqwedhes teylû Osborne en Newmill, ogas dhe Crankan keffres ha Trythall. Lebmyn, nei a or fatel o Jane Osborn (17??-18??, demedhys en 1800) mabm John Davey (JD an yonka ew hedna, neb era trigys yn Boswednack 1812-1891 - neb a gowsas Rim Crankan). Hobson Matthews, neb a dhyllas Rim Crankan e'n History of St Ives (1893), a scrifas fatel wrüg an yonka John Davey desky an rim a'y sira ev, neb o John Davey an cottha (1770-1844), gour Jane Osborn.

Piw o hei, Jane Osborn? Piw o hy theylû hei ? Mars o anjei, an teylû Osborn, trigys en ogas dhe Newmill ha Crankan et an termyn na, a wrüg an 'Crankan rhyme'  doas dhe John Davey dhort y dhama ev en le y sira ev ?

En scrifow, thew kevys bes nebes 'dro dhedhy. Hedn ew, en Journal of the Royal Institution of Cornwall (JRIC), 21 (1923) pp 146-15 gen Robert Morton Nance, ha Old Cornwall (OC) volume 11 (1991) pp 61-65 gen Peter Pool. Calish ew cawas derivas moy. Pandra ero'whei o tyby?

(Pur senjys oma dhe Peter rag an scrif ma. Therom perthy co a Willie Osborne. Ort an henwyn teller eus obma: Ma scrifys gen Craig fatel o Newmill henwys Chei Noy en termyn eus passyes. Òja hedna e veu creiys Mulfra New Mill. Rag Four Lanes, ma radn üjy laul Crowshens Pencoos drefen e dhe voas pur ogas dhe 'Pencoys'. Moy dro dhe Rim Crankan ken vo pell. Neil)

1 comment:

  1. Et an lyver "The Osbornes of Zennor", vol 1, gen W A Morris (1999), nag era'vy ow cawas marnas 2 Jane Osborne a'n oos na ha era trigys en Senara / Zennor, ha anjei veu genys 1766 (-1768), a'wedh 1768 (-1789). Ytho, nag o an eyl po hy ben hei an Jane Osborn neb o dama J Davey. Metesen hedn a wra disqwedhes na hevel dell era Jane Osborn a'n bluw na (Zennor) dre liklod. Metesen ma neppeth 'dro dhedhy en volume 2, bes nag era copy anodho dhe'n Cornish Studies Library.

    ReplyDelete