Monday, 11 May 2015

Tredden in Scath

Pa wrüga vy clowes fatel wrüg omdedna an trei fedn an partys Lavür, Democrat Liberal ha UKIP, tybyas gocky a dheth dewhans dhe'm bres: fatel via da gwil antarlik wharthus en ûsya neppeth a'n lever-ma, Tredden in Scath. An treylyans-ma gen Nicholas Williams a vedh ithik da gena whei, tho vy sür a'n dra. Ma kevys ganso (NW) dyffrans vorrow dhe treylya an gesyow ha'n whedhlow eus en kensa versyon Sowsnek an lever heb kelly tra veth a'ga sawer a vedh pup pres dhe gan plegadow en treylya an volednow. Ma radn ahanowgh, martesen, na veu redyes gansy an lever en Sowsnek. Lebmyn whei ell y redya rag an kensa termyn en Kernôwek. Teg ew semblans an lever y honan, pecar'a oll an levrow a veu dyllys gen Evertype - ha ma lies anodhans en Kernôwek lebmyn. An scrifa compòster KS ew esy dhe redya. Scant nag eus dyffrans tredh hedna ha'n FSS 'Diwedhes' üjy Cussel an Tavas o ûsya.
An peth eus obma, awoles ew scrifys en KS.
  
Tredden in Scath (Heb Gwil Mencyon a’n Ky)By Jerome K. Jerome, translated into Cornish by Nicholas Williams, with illustrations by A. Frederics
2014. ISBN 978-1-78201-055-5

Yth yw an screfor ha'y dhew gothman, Jory ha Harrys, acordys y dhe vos ow lavurya re grev i'n dedhyow dewetha hag indella aga yêhes dhe sùffra. Yma an try den yonk ytho owth ervira kemeres degolyow in scath wàr Dhowr Tamys, ow tallath dhyworth Kyngston hag ow mos bys in Resohen. Ymowns y ow kemeres Montmorency, hèn yw aga broghky, gansans inwedh. Yma acownt rës i'n lyver a'ga aventurs hag a'ga droglabmow wàr an trumach; yth yw kefys ino inwedh lies whedhel wharthus, rag ensompel, ow tùchya bos prysonys in ker droya Lës Hampton, andhiogeleth barometrow ha'n problemow usy ow pertainya dhe dhesky an pîbow sagh. Y feu Tredden in Scath dyllys rag an kensa prës i'n vledhen 1889 ha nyns êth ev bythqweth mes a brynt dhia an termyn-na-dùstuny apert a'y vos meurgerys gans pùb henath

No comments:

Post a Comment