Sunday, 10 May 2015

Òja an dowisyans, an dagrow ha'n sor, ha pandra nessa?

Na wrüg besca keslavürya gen an Torys.
Pandra ella nei leverel dro dhe'n dowisyans kebmyn en Kernow ha Breten Veur ahês heb gorra keniver onen a ell redya hebma dhe ola? Whath nag ew pell eth o Kernow melen gen liw an Democratyon Liberal bes lebmyn eth ew glas gen liw an Torys! Pandra üjy hedna o menya? Fatel wrüg hedna skydnya en pow leb era bes senedhoryon Liberal ha Lavür na moy vel nebes bledhednow alebma?
Nag üjy Cussel an Tavas o scodhya party vetholl, rag ma an tavas-ma rag oll an bobel, agledh ha adhyhow ha en cres an dhew, na vern aga bres dro dhe'n gwella maner dhe rowlya an pow. Na whath, nag eus meur a düs a'n barh dyhow et agan mesk, war an diwa, ha na vedh cüdhys an dra obma! Na amownt dhebm argya an contrary bes gwell via compla, na whath, dr'ew an peth era vy o scrifa obma o thybyas vy, kens es opinyon an Cussel. Cows adro dhe hedna (polityk an pow, thera vy o menya) ew mater pur dyckly e'n eur-ma rag ma radn o whilas dhe derry an geveren a vedha puppres convedhys tredh Kernôwek ha tybyanjow gwolasek. Mons o whilas dhe skesy rag keniver contravercita na vo senjys agan tavas diantel gen a' re üjy rei mòna dh'y scodhya terweythyow. Nag era vy en mesk an düs üjy pedery en maner-na. Sür oma na veda nei nevra derevel an tavas-ma arta po nag era nei chaunjya an maner dhe rowlya Kernow en kettermyn. Na vedh gwithys ha crefhes an tavas na vo gwres gan moyha dhe wil dhe'n Gernôwyon gortos war aga dor ewedh. Heb Kernôwyon e'n pow pandr'a dal an tavas? Dar, me a venja godhvos!
Lebmyn, ma üdn party dres oll a' r'erol, üjy prest o shyndya colon ha corf gan cowethyans. Mons o scodhya ha yny crefny ha covaytys an dhisplegoryon (developers) war pub tro. Mons reqwirya Kernow dhe gawas milyow a dreven ker nag eus odhom anodhans ha mons qwitha Kernow dhort gwil an peth ew dhe les raga nei, an g/Kernôwyon, dre vroas. Eus co dhewgh a'n termyn era Thatcher en pedn an hager lû-na, gen 'y bool lebmys e'n eyl dorn ha'y thigen et y gila?! Thew Thatcher ha'y howetha a wrüg compellya gan cussüljow tiredh dhe werha ga threven poblek ha thew an keth para – drogoberyon oll - era prest sconya a clowes odhom agan economy. Milyow a'gan pobel eth kerr pa veu scattys an balow ha'n gweythow. Nag  era gweres veth dhor an governans dibitty-na, keth era gweres lowr dhe'n wicoryon olcan en Loundres.

Pa wrüg an Cons cawas an gallos arta en dadn Cameron, thera radn o supposya der via gwell, saw nag o endella! Cameron a dhalathas gweres dhe'n dhisplegoryon arta: ea, moy vel kens ha scant na alja boas lacka!

Kernow ha'n SW en 2005. Na vedh gwelys arta.
Gerow nei dhe bedery a'n termyn eus passyes. Dhort henedh dhe henedh an g/Kernôwyon – lies anodhans – era o vôtya rag an Liberals o kelmys fast dhe'n eglos Vethodyst ha'y valews a ownder ha justys rag keniver onan. Òja hedna, nag o marth pa vôtya an nessa denithyans rag an Democratyon Liberal warlergh an tradicyon. Thew an Liberals a dhros mes an campyer broas David Penhaligon, mab gweyth Holman, era puppres o cows mes rag an bobel et y gostys ev ha'n vohojogyon ha'n weythoryon oll en Kernow ha pella. Thera Penhaligon omglowes es gen senedhoryon an Party Lavür ewedh. 

Chaunjys ew an rowl lebmyn, sos! En le Penhaligon ma tulloryon ew parys dhe geslavürya gen an Torys, parys dhe vôtya rag servisys privedh en clojyow ha tollow en chombours a' re omdednys. Ea, thew an Democratyon Liberal a settyas Cameron en Downing Street ha y witha ena. Rag meth! Jei ell pejy gavans dhorta nei lebmyn dr'ew sqwachys ga fara en temmigow bes na vedhons pardonys gen an bobel onest era ga threstya kens.

Kernow o melen, po melen ha rüdh terwethyow (An qwartron Lavür veu trehys en dew radn gen an Gerrymanders en Loundres na alja boas dowisys arta.) Lebmyn ethew glas – ea, an kensa termyn a veu gwelys hedna! Ma radn ahanan na wrüg vôtya ha radn a ros ga voysys dhe ombroforyon na alja pur wir gwaynya an weth-ma... ha'n Democratyon Liberal veu fethys en pub le. Da aqwitys ens!

Pandra nessa, cowetha? Na ella nei pejya endella mar meda nei sawya Kernôwek ha derevel pow own ha crev. Res ew dhen settya Kernow war y threys ha gwil diwedh dhe wary an hager displegoryon üjy o tefolya agan pow. Na vedh  gerys teller veth dhe'n bobel nag ew rych lowr dhe berna aga threven ker. Na vedh whel lowr naneyl p'o dynys milyow a düs vas dhor an citys dhe kesstrivya ganjons rag an nebes a whel eus. Ew devedhys an termyn rag towl nowydh? Wos oll aga whel ha ga holon na wrüg MK gwaynya tra veth. Alja MK ha'n Party Gwer moas rag warbarh ha kemeres emann a' re era vôtya rag an DL kens? Eus neppeth rag an Party Lavür dhe wil? Gerow nei dhe bedery dro dhe hedna - ha kebmys a maters a eus - en misyow a vedn doas na vo re dhiwedhes rag an nessa dowisyans kebmyn.

No comments:

Post a Comment