Wednesday, 22 April 2015

Kerres dhe bedn an vre (radn 1)

The first part of a story...
Tewal o an nos ha me o moas war an vorr. Na aljama gweles pella vel dew lath deragam ha me geth tabm ha tabm en tewlder rag own trebuchya ha terry gar po browy gwewen mesk an meyn o scòllyes war bub tû an vownder, rajel dirowl an carn hag atal dhor an mengledh, overdevys lebmyn, gen eythen ha grüg ha spern. An pres o hanternos ha me a dalvia boas en sca (cusca), pell dhor an le-na, mellyes et o gwily pecar'a flogh vian. Wos an tewlder me a welas shâp hugeth an menedh vel skeus bedn an ebòrn; carn garow, üdn broster a garrek dhyasseth ha calish a welas devedhyans an kensa tüs hag a vedh kehaval mil bledhen alebma, nevra sür ha bysqwethek, dürya wos pub treylyans an governans ha sians polityk an leders.

Me eth rag, cabm ha cabm war an vorr, o lagajow egerys bedn pub gwayans en prysk ha'm scovarnow lebmys bedn pub son ònketh en cana an gülyogas-redan ha tros segh an delkyow. Me gramyas heb gwil gik na mik dhe'm disqwedhes. Piw a oya peth a via asspir pe traytour dhe'm dyskyvra? Onen nodhans alja boas o plattya en redan ha'n carrygy malja mires orta vy, parrys dhe'm cuhudha. Prest ema tüs gwadn ga skians a vedn betraya a re-na onest, ew bes nebes en bes wor an diwa.

Ha me o kerres, me brederas an peth era adheller dhebm, an düs, an chei coth ha'n lôwar, o levrow ha'm whel... an peth o bownas mar medna whei. Moas dhe bedn an menedh a venjama, eneth moy ken moas kerr, eneth arta maljama gwitha an syght et o lagas rag nevra, üdn co dhe dhegy genam bes vicken, na vern pele via a annedh. Na oyan pana pres via gwelys genam arta na fatel aljama doas en dro naneyl. Na aljama ponya kerr ha forsakya keniver onen ha keniver tra erama senjy ker. Res via doas tre òja spis, poken na oyan vy pana quartan a venjama moas, nevra gwandra car'a prieryn kellys en devyth. Pa vema skith, nag era skesy rag an dra era res demm gwil bes whans o dhebm kerres dhe bedn an vre kens. Òja hedna, me a via odhom festena bedn terry an jedh.


No comments:

Post a Comment