Tuesday, 10 February 2015

Piw o whei, Kernowyon? (1) Peter Mundy

Peter Mundy, Merchant Adventurer book jacketPeter Mundy a veu genys en Penrin (po Perin) en Kernow e’n vledhen 1600, moy po le. Tho Mundy an kensa den en Breten Veur a screfas adro dhe eva te. Ev a lavaras fatel wrüg tastya “chaa” en Chiny, pa wrüg moas ena. Rag hedna nei alja pur dha leverel chaa dhe voas moy Kernôwek vel Sowsnek! Mundy a evas chocolat tòbm e’n gorhel marchont a Spayn ewedh. Ev eth dhe lies pow a’n bes, en Asia ha Europ magata. Ev a eth dhe Russia, Pow an Danow, Prussia, Turky, Spayn, Portûgal, Eynda (Utter Pradesh, Gujarat ha Bengal, rag sampel), Japan ha whath enesow ha powyow erol na orama dhe compla òbma.

Nag ew marth y vôwnas ha y gawl pa thera nei consydra y floholeth ha pedery fatel era marchons dhort Penrin en Constantinopel ha Rom ha’n Enesow Canary en dedhyow-na. Mab marchont hern o Mundy, nep a eth gen y sira dhe Rouen en Frenk termyn e veu maw, naw bloodh. Òja hedna e veu denvenys dhe Gascony m’alja desky Frenkek. En 1611 ev eth dhe’n mor vel maw en gorhel marchont ha tabm ha tabm òja hedna e wrüg gwella (po gwelhe) condicyon y vôwnas e’n East India Company terebo veu den rych lowr. Nei ell supposya der oya dhe clappya Kernôwek rag en dedhyow-na oll an bobel e’n west a’n pow, ogasty, a oya an tavas, ha’y Sowsnek scrifys o pur dha. Et y lever entitlys Itinerarium Mundi (gwary geryow gen y hanow), e scrifas nebes geryow Kernôwek, rag sampel an ger morgy, neb ew ehen a besk. E’n keth lever ev a screfas nebes geryow en Portûgalek ewedh. Ma y hanow Kernôwek o menya ‘Mineral House’, dhort an ger “moun” (metal ore, mineral) ha -dy, -ty, -jy (chei, house). Ev a spenas y vledhydnyow diwedhes, tredh 1663 ha 1667 en Falmeth leb alja gwelys an gorholyon o moas ha o toas e’n porh.

The first person to write about tea or "chaa" in Britain was a Penriner who went all the way to China for it. Here he is pictured in the traditional red and black colours that all true Penriners aspire to. Up the Borough!
http://www.bodleian.ox.ac.uk/news/2011/2011-dec-16

No comments:

Post a Comment