Sunday, 1 February 2015

Jôwan Chei an Horr (an kensa poynt a skians)

En termyn eus passyes thera trigys en Selevan den ha benyn en telher creiys Chei an Horr, ha’n whel a godhas scant: Ha medh an den dhe’n wreg: “Me a vedn moas dhe whilas whel dhe wil, ha whei ell dendyl gas bownas obma.” Cübmyas teg ev a gemeras, ha pell dhe est ev a dravalyas, ha war an diwedh e wrüg doas dhe chei tiek ha wrüg whilas ena whel dhe wil.“Pana whel elles ta gwil?” medh an tiek. “Pub whel oll,” medh Jôwan. Ena jei a vargydnyas rag trei pens* a’n vledhen gober. Ha pa thera diwedh an vledhen, y vêster a dhisqwedhas dhodho an trei pens. “Mir Jôwan,” medh y vêster, “obma dha wober bes mar men’ta rei dhebm arta, me a dhesk dhis kens poynt a skians.” “Dr'ew hedna?” medh Jôwan. “Na,” medh y vêster, “ro e dhemm, ha my a vedn leverel dhis.” “Kemerowgh dhàn!” medh Jôwan. Nena medh y vêster: “Kemerowgh with na wrewgh gara an vorr goth rag an vorr nowydh.” Nena anjei a vargydnyas rag bledhen moy, rag pecar gober ha pa thera diwedh an vledhen, y vêster a dhros an trei pens. “Mir Jôwan,” medh y vester, “obma dha gober,** bes mar men’ta ' rei dhemm arta, me a dhesk(a)*** dhis ken poynt a skians.” “Pandr’ew hedna?” medh Jôwan. “Na,” medh y vêster. “Ro e dhebm, ha my a vedn leverel dhis.” - “Kemerowgh dhàn!” medh Jôwan. Nena medh y vêster: “Kemerowgh with, na wrewgh ostya e’n chei lebma vo den coth demydhys dhe venyn yonk.”
 
*Mutation of <p> to <f> is not observed in the original text. *** Mutation of <go> to <o> is not observed either.  ***In the original text, Boson wrote "me a deska deez" with an unexpected a ending.

No comments:

Post a Comment